Ti je aty, përballë,
fare pranë meje dhe prapë e paarritshme
si Hëna.

Jam nisur të të mbërrij si një kryqtar.
Nuk e sheh ç’zor që kam?
Nga njëra dorë më tërheq Dante drejt Ferrit,
nga tjetra Don Kishoti drejt…

Dhe s’di ku je ti.
Je Beatriçe, a je Dylqinjë?

E megjithatë…

Këngë për vahet

Edhe lumi e ka ditur
se njeriu, kur rri pa njerinë,
bëhet varri i jetës së vet,
edhe lumi e ka ditur.

Edhe mali e ka ditur
se njeriu duhet të shohë përtej majës së tij,
ta ndiejë veten të gjallë në jetën e të tjerëve,
edhe mali e ka ditur.

E kanë ditur mali e lumi
e janë hapur te vahet.