Ura e Mesit kaluar mbi Kir
siç më mbaje ti mbi kurriz
lumi peshen e njëmije vjetëve
ti pesë vjetët e mija

dy brigje bashkon ura
ti me bashkon me fëmijërinë e herëshme
gurët e urës, s'i hëngri dot lumi
gurët e shpirtit mi grryejti malli për ty, Marie!

Gur në gur
lumi fustanin ta prekte
ti qeshje Marie, ti qeshje
fëmijërinë time akoma në krah merr:
...hop matanë lumit
hop, matanë fëmijërisë!

Gur në gur
në kreshtat e valëve
ti këndoje, Marie, këndoje
në shpatet e maleve
...fëmijëria ime kaluar
në këngën tënde!

Gur në gur
në lumë e në shpate
"Shegë e ëmbël, shegë e butë
më shkoi vera pa të këputë..."
...sikur ti të ishe shegë
varur shpatit në një degë, Marie!

Gur në gur
me faqe të kuqe
plasur shega në buzë
aromë vjollce në gojë
era mollë era ftua
qershizë moj Marie
e pastër si krua!

Gur në gur
pësëmbëdhjet vjetët e tua
vdekja ti rrëmbeu
me lotin e kaltër
për lumin, për zogjtë
për mua, Marie!

"Shegë e ëmbël, shegë e butë..."
s'e dëgjuam më atë këngë:
në verë shterroi lumi
në vjeshtë s'pati shegë
në dimër ikën zogjtë
...katër stinë pa zërin tënd, Marie!

Tridhjet vjet rrodhi lumi në merakun tim
kreshtë e mallit ndezur
kënga e shegës së ëmbël mbeti lidhur
në nyjë të fëmijërisë

urë që lidh dy brigje
dy shpate
dy degë
dy zogj
dy këngë
dy jetë

...fëmijëria ime me rininë tënde
lidhur nyje Marie!

Hot i Ri, Shkodër 1985