Dhe sot vargjet s’janë më
koha e pazisë u tret
shkërdhyer me kurvat e natës
rokerët me mjekra të pakrehura
vrasinë vetmit e heshtura, vetmit e tulitura
kitarat ruajnë risi
historia pjellë rrena
rrenat çelin në histori
e ju:
nëse doni ta dini cila është dashuria ime
merreni qiellin në shuplakë, numëroni yjet në dorë
bashkë me pluhurin, verën, rakinë, tupanat, çiftelitë
merrne tokën, gjakun shtrydhjani në damar
nëse doni të dini cila është dashuria ime,
përuluni para Krishtit të gozhduar, shikoni me mall plagët e tij
e ju:
nëse doni të dini cila është dashuria ime
mos harroni varret, ato s’heshtin,
varret e dhunuara
Dheu i çartur hapëron
Jeta sillet si në unazë, herë ecim një hapë para,
Pastaj përplasemi dy mbrapa
Kaherë më është thënë se jeta jonë sillet si në unazë dhe Shtegun kërkon
Notojnë plagët notojnë
Brenda kopertinash, librash, historish
Pshurrin, helmojnë në kokë
Të kuq gjarpinjtë, të zi
Notojnë plagët
Prej rrufesë pa re
Tokës së sertë i pëlcet gjaku në dhe
Klith koka kohëra të shumta lidhen lak
Krisma daullesh iu bie në sy
Sytë pasqyrë ku thyhen kohët, ku prehën yllësi
Notojnë plagët sa në qiell sa në det, metafora ime e çartur diku në pafundësi pëlcet
E ju nëse doni të dini cila është dashura ime:
Më mbytni me zjarr, me zjarr më mbani gjallë
Barkun tim me zjarr mbusheni
Zjarr le të digjet toka
Qielli zjarr le të digjet
Koka dhe truri im
Zjarr