Një trëndafil i kuq nën dëborë: nuse nën vello
Virgjëria në pragzgjimi përgjon fjalën “thellë”
                                     përgjon fjalën “thellë”.
Trëndafil fustaneartë
me të kuqen ç’shkruan në kartë
e kuqja: gjaku
dëbora: kartë
petalet: zhvirgjërim i artë.
Trëndafili i shtrirë brinjas josh natën të bie në borë
Yje e kristale e petale të shkrihen në parfum ëndërror.
Trëndafil ulur në shkëmb: princeshë në fron dashurie
Pranomë dhe mua të ulem mbi gjemb, frikë mos kij se do bie.
                                                              frikë mos kij se do bie.
Trëndafil trëndafil trëndafil: plagosur brinjas në borë
Trëndafil një vetëtimë
                këputet pak
               të bën kurorë
                         plagosur brinjas në borë.
Një trëndafil në borë: harresë ledhatare në shportë magjistareje
-Trëndafil do vdesë e duke shkrirë me borën do mbesë pa varre.
Plagosur brinjas në dëborë u  ngre lavdi mëkatareve.
                                            u  ngre lavdi mëkatareve.
1 dhjetor 2006
Shkëputur nga vëllimi i ri “Hallelulja”, botim i “Globus R.”
© Petraq Risto