Të kam tradhtuar jeta ime
unë, objekti i vetëm i yti
përse s'më shkele,
pse s'më braktise
përse s'më kape për fyti!!....

Por...
të kam dashur jeta ime
unë, objekti yt i vetëm
të dy u lidhëm,
të dy u zgjidhëm,
të dy së fundi mbetëm.

Qejfpaprishur
si shaka publike,
një-mijë herë
zilepsur e përgjuar,
më e pashmangshmja ishe
forcë e brishtë
nga të gjithë sulmet
që më kanë sulmuar.

E pra ...
s'qeshë kala prej rëre
shkëmb qeshë si majë e Shkëlzenit,
poho...
tu deshën vite të ndryshoje
mënyrën time
gjëndjen e të qenit.

E të qenit gjumë mëngjesor
veshur gjithë arsye
këmbë e kokë,
e të qenit hipotezë e sigurt,
e të qenit bos me xhepat trokë.

Shihmë tani
kryet e kam ulur,
duke e bindur zemrën fije - fije,
se bishti në shalë kur më sjell paqen
është një xhest i vlefshëm zgjuarsie.

Tash në duar mbaj
ethe - etjen tënde,
të brishtë,
të tejzgjatur,
bërë pe...
të kam parë prej saj të vesh cigaren,
të kam parë sërish tek e le.

Korrigjove shijet edhe stilin
me prestigj lumenjsh po rrjedh në mua,
gjysmës shpirtit më ke lënë vajzë
gjysmës tjetër
më ke bërë grua...

Lexo/Shkruaj Komente (0)

Printo

Dergoje

Top

---