“Hija e erës” Carlos Ruiz Zafon

Shtëpia Botuese “Dituria”

Përkthyer: Ardian Klosi

Çmimi: 1000 lekë

Një nga shkrimtarët e njohur bashkëkohorë spanjollë, Carlos Ruiz Zafon, po vjen në gjuhën shqipe me romanin e tij, “Hija e erës”, përkthyer nga Ardian Klosi dhe publikuar nga shtëpia botuese “Dituria”. Zafon ka lindur në Barcelonë më 1964-ën dhe është fitues i shumë çmimeve letrare prestigjioze në Spanjë, por romani i tij “Hija e erës”, që u botua në vitin 2001, u shndërrua menjëherë në një sukses të pabesueshëm. Në Spanjë, ky roman, vetëm brenda 2 viteve pati 29 botime, ndërsa deri më sot ka arritur deri në 43 botime. Romani i Zafonit është debutimi i tij në skenën ndërkombëtare i një rrëfimtari të jashtëzakonshëm që ka ringjallur traditën e madhe të romanit të tetëqindës, me një ndjeshmëri të thukët bashkëkohore. Në vendet e mëdha, “Hijet e erës” vijon të mbetet edhe sot një bestseller i vërtetë, si dhe të konsiderohet si një nga majat e narrativës spanjolle. Në “Dramatis Personae”, 1966, Zafon do të rrëfejë: “Hulian Karakasi e mbyllte Hijen e Erës me një epilog të shkurtër, që u skiconte lexuesve ardhmërinë e personazhe të vet. Kam lexuar libra pa fund qysh prej asaj nate të largët të vitit 1945, por romani i fundit i Karakasit mbetet ai që pëlqej ende më shumë nga të gjithë. Tani jam bërë gati 30 vjeç dhe do të jetë e vështirë të ndërroj mendim. Ndërsa shkruaj këto radhë mbi banakun e librarisë, im bir Huliani, që nesër mbush 10 vjeç, më vëzhgon duke buzëqeshur, i mrekulluar nga stiva e fletëve që bëhet gjithmonë edhe më e artë. Kushedi, ndoshta ka mendimin se edhe t’et i është ngjitur ajo sëmundje e çuditshme e librave dhe fjalëve. Huliani ka sytë dhe mençurinë e së ëmës, por më pëlqen të besoj se ka trashëguar naivitetin tim...”.