Jo vetëm kur ka qenë drejtor i Muzeut Historik Kombëtar, por edhe tani që nuk është pjesë e atij institucioni, nuk mund të rrijë indiferent ndaj përvjetoreve historike.
Nga Anila Mema
Në të vërtetë është historian dhe si i tillë di t'u japë rëndësinë e duhur figurave të njohura. Moikom Zeqo, aktualisht drejtori i muzeut "Mezuraj", këto kohë pret të nxjerrë nga shtypshkronja një vepër madhore për heroin shqiptar, Gjergj Kastriot Skënderbeun. Pse jo, dëshira për ta nxjerrë qoftë edhe dje për 540-vjetorin e ndarjes nga jeta, nuk ka munguar. Thjesht duhet pak kohë e durim. Megjithatë kjo nuk përbën ndonjë problem. E rëndësishme është që së shpejti, ndoshta brenda dy muajve, do të hidhet në treg një botim i veçantë për Skënderbeun, për të cilën Zeqo ka vite që punon. Eshtë një botim mijëra faqe, që do të shoqërohet jo vetëm nga fotografi ilustruese, por edhe nga gravura, por bashkëngjitur tij në mënyrë grafike do të jetë edhe libri i Skënderbeut, që ndodhet në Vajmar të Gjermanisë.
Të reja për Skënderbeun
"Libri përmban një mori dokumentesh të reja, me fakte të reja, që nuk janë thënë më parë për Skënderbeun", shprehet Zeqo për gazetën, teksa tregon se faktet që do të përshkruhen në libër bëjnë fjalë për çështje që lidhen me origjinën e Skënderbeut, familjes së tij, simbolikën e disa objekteve. "Një pjesë të veçantë në libër e zë varri i tij, flitet gjerësisht për të, por në një kapitull të veçantë janë përfshirë edhe poezitë që kronistët osmanë kanë shkruar kundër Skënderbeut dhe poezitë e poetëve evropianë që shkruan pro Skënderbeut", thotë Zeqo. Ndërkohë në libër sipas tij, do të ketë edhe shumë gravura të panjohura më parë për heroin kombëtar. "Libri është gati dhe besoj se për dy muaj do të nxirret në librari. Por bashkëngjitur tij, do të jetë edhe libri i Skënderbeut që është në bibliotekën e Vajmarit, por kësaj here në mënyre grafike", thekson ai.
Objektet e heroit
Ndërkaq, teksa bën një "inventar" të objekteve origjinale të heroit kombëtar si në Shqipëri, ashtu edhe në botë, rezultojnë një shifër e vogël e tyre. Sipas Zeqos, i cili ka drejtuar Muzeun Historik Kombëtar për disa vite me radhë mësojmë, se nga Skënderbeu janë tre libra, njëri ndodhet në Vajmar të Gjermanisë, një tjetër libër i zbuluar nga studiuesi, Fotaq Andrea, që i përket bibliotekës së Skënderbeut, si dhe një libër i tretë në të cilin përfshihen lutje e psalme për Shën Mërinë, e cila sipas Zeqos, ndodhet në një nga bibliotekat e Londrës, në Angli.
"Këto janë tre libra të bibliotekës së Skënderbeut, tre objekte të tij, ndërsa dokumente ka shumë, qoftë edhe në Vatikan. Ndërsa në Vjenë ndodhet përkrenarja dhe shpata e tij, asgjë tjetër nuk posedohet nga heroi ynë", shprehet Zeqo. Ndërkohë në Shqipëri, nuk ka asgjë origjinale të Gjergj Kastriotit. Të vetmet objekte që i përkasin kohës së Skënderbeut, janë dy kambana që ndodhen në muze. As në Lezhë, ku ndodhet memoriali i heroit, as në Krujë nuk ndihet ndonjë objekt origjinal i tij.
540 vjet
mbushen që nga 17 janar 1468 kur Gjergj Kastrioti Skënderbeu u nda nga jeta. Heroi shqiptar sintetizon një epokë të tërë historike, që mori emrin e tij në luftën kundër pushtimit osman
Lexo/Shkruaj Komente (1)
Printo
Dergoje
Top
