Esat Mekuli/Pesë vjersha
| Sunday, 03.16.2008, 04:54 PM |  

NGA LETËRSIA JONË E PARALUFTËS SË DYTË BOTËRORE

 

 

Esat Mekuli/Pesë vjersha

/Këto vjersha janë botue gjatë vjetëve 1933-1935 në revistat “Vjenac” e “Jugosllovenski rastit”- Beograd edhe “Mladost”-Zagreb./

 

MBRAMJA

 

Si tufa mëndafshi t’artë në të kaltërten shamí,

N’mes dy duersh s’bardha, dy kokrra në borë-

Flakron perëndimi... Retë mbi krye përorë

Ngasin nëpër qiell dhe zhduken n’hapësí.

 

... Dhe drita e mbrame shuhet mbi çdo sukë:

Cipa e natës shtrihet mbi fusha t’përhime,

Malet heshtin n’errësi si me  qenë të ngrime,

Si të humbte jeta- çdo gjâ u nxi, u zhdukë.

 

N’ajrí ndihen klithmat e natës që ra-

Drujt pranë rrugës lehtas era i lëkund...

..............................................................

Ndërsa dita e bardhë, e tretun dikund

 

Shigjeta të flakta i mprehë errësinës me i ra.

Terri sundon botën. Katundet e shtrime

Në mes natës prehen n’luginë me andrrme.

 

(1933)

 

ANDRRA E VAJZËS

 

Shushurima e lehtë t’panjoftunit më treti fare

Dhe agime t’kaltërta andrrova...

 

E nëpër kunorë lakmish përolimtare-

Si lulja që jep qiellit lulëzim:

Rininë ia dhurova.

 

Shkëlqyen yjtë e qiellit si sytë e tij

Të thellë dhe të ndritshëm

Si drita n’agim

Dhe u shafit nën tê e kërthndezëtat fuqi...

 

-Sonte shushurima e lehtë t’panjoftunit më treti fare

Dhe agimet e kaltërta andrrova...

 

(1933)

 

PRANVERA

 

Zhytem krejt n’bukurít e larme që ka pranvera

Dhe me shpirt qafoj mbulojën e kaltërt t’pambarim

N’zemër m’shtohet flaka, në krye i kthjellmi mendim

I kthjelltë si qielli, i dashtun si e luleve era.

 

Unë s’njoha deri tash lojë ngjyrash as larmi-

Gufime që si lule të shpirtit mugullojnë...

Përqark âsht pranvera e n’zemër sytë e tu ndriçojnë

Për ta më lëbyret mendimi, tretun në vetmi.

 

...E tash zhytem n’tbukurit’ që pranvera na e ka prû

Dhe me shpirt qafoj mbulojën e kaltër t’pambarim

I kthjelltë si qielli, i dashtun si sytë e tu!

 

 

MMALLI PËR T’PAMBËRRIJTSHËMEN

 

Rêtë luejnë n’naltësín, si qingjat n’kodrina,

Ndërsa malli për t’pambërrijtshmen ndryhet n’mue:

 

Dëshirojsha m’u kapë n’vallen e reeve kuqle

E me fluture në t’shkëqyeshmet naltësina

Me gëzimin e këngës baritore...

 

E kur hana e luginave ia beh n’shpejti

Dhe toka natën n’dishrim thërret,

Si rrezet e argjendta mbi kallí-

Të shkoj

E t’vizitoj

Skajet e dhimbjes e vendet ku pashë ankthet.

 

Vaj! Me u kapë n’vallen e rêve n’kuqlime

Zemra me t’dhanun do t’më dëshironte

Që rinija t’gërthet ‘i herë mâ me gëzime

Dhe mall i zemrës s’vuajtun t’gufonte.

 

-Por, pse zemra tingëllon përmallshëm

                                    si zâ drithërim

dhe droja kaplon thellë zemrën e shpirtin tim?!

 

Kur dëshiroj aq rêtë mbi qytet me i soditë,

Derisa malli për t’mabërrijtshmen, m’kap, m’shafit.

 

(1934)

 

VEGIME

 

Si edha t’shpërndamë rrëshqasin n’kaltrim tufat bardhore

dhe qielli kumbon n’nardhësít e tija virgjinore...

 

Nji zemër e bardhë e nxitun prej bukurije

Andrron mbi hijet e zgjueme... E fatlume...

Malet e krepatueme shtrihen prej largësie

Dhe mëshefin n’qetësí dhimbjet e pashërueshme...

 

Nji dorë e padukshme mbi zemëratë lënduese

                                                sonte përshkoi

Dhe njomësín e fëminís, kaherë t’kalueme,

                                                n’mue e zgjoi.

 

Sat NOKSHIQI

 

(Marrë nga revista letrare “Jeta e re” nr. 1/1952, f. 34-37)



(Votes: 0)

Write Your Comment
Your Name:
Your Email:
Security Code:
Title:
Comment:

Other news:



  • Su
  • Mo
  • Tu
  • We
  • Th
  • Fr
  • Sa
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 31
  •  
  •  
  •  
  •